ଜୀ ସାର୍ଥକରେ ମେଗା ଧାରାବାହିକ ‘କେମିତି କହିବ କହ’

0
181

ଅକ୍ଷୟ ପରିଜା ପ୍ରଡକ୍ସନର ନୂଆ ମେଗା ଧାରାବାହିକ ‘କେମିତି କହିବି କହ’ ଆଜି (ଜାନୁଆରୀ ୨୫ ତାରିଖ)ଠାରୁ ପ୍ରସାରଣ ଆରମ୍ଭ କରିବ। ଜୀ-ସାର୍ଥକରେ ପ୍ରସାରିତ ହେବାକୁ ଥିବା ଏହି ବ୍ୟୟବହୁଳ ମେଗା ଧାରାବାହିକ ପ୍ରଥମ ଥର ପାଇଁ ଏକ ପୂର୍ଣ୍ଣାଙ୍ଗ ଚଳଚ୍ଚିତ୍ରର ସମସ୍ତ ବୈଶିଷ୍ଟ୍ୟକୁ ନେଇ ନିର୍ମିତ ହୋଇଛି । ଏହାର ପ୍ରମୁଖ ଭୂମିକାରେ ଅଭିନୟ କରୁଛନ୍ତି ଓଡ଼ିଆ ଚଳଚ୍ଚିତ୍ର ଜଗତର ସୁପରଷ୍ଟାର ସିଦ୍ଧାନ୍ତ ମହାପାତ୍ର ଏବଂ ତାଙ୍କ ବିପକ୍ଷରେ ନାୟିକା ସାଜିଛନ୍ତି ଜଣାଶୁଣା ଅଭିନେତ୍ରୀ ସୁପ୍ରିୟା। ଏହା ବ୍ୟତୀତ ଇଶା ବେବର୍ତ୍ତାଙ୍କ ସମେତ ଓଡ଼ିଆ ସିନେମାର ଅନେକ ପରିଚିତ ଅଭିନେତା ଓ ଅଭିନେତ୍ରୀଙ୍କୁ ଏଥିରେ ଦେଖିବାକୁ ମିଳିବ।  ‘କେମିତି କହିବି କହ’ ହେଉଛି ସିଦ୍ଧାନ୍ତଙ୍କ ଅଭିନୀତ ପ୍ରଥମ ମେଗା ଧାରାବାହିକ। ସିଦ୍ଧାନ୍ତଙ୍କ ଅସଂଖ୍ୟ ପ୍ରଶଂସକ ଏବଂ ଛୋଟ ପରଦାର ଅଗଣିତ ଦର୍ଶକଙ୍କ ପାଇଁ ଜୀ-ସାର୍ଥକ ଓ ଅକ୍ଷୟ ପରିଜା ପ୍ରଡକ୍ସନର ଏହା ସବୁଠୁ ବଡ଼ ଉପହାର ତଥା ନୂଆବର୍ଷର ଭେଟି ବୋଲି କୁହାଯାଉଛି।

ଓଡ଼ିଆ ସିନେମାର ସଫଳ ନିର୍ଦ୍ଦେଶକ ସୁଶାନ୍ତ ମଣି ମେଗା ଧାରାବାହିକ ‘କେମିତି କହିବି କହ’ର ନିର୍ଦ୍ଦେଶନା ଦାୟିତ୍ୱ ତୁଲାଇଥିବା ବେଳେ ଏଥିରେ ସଙ୍ଗୀତ ଦେଇଛନ୍ତି ଲୋକପ୍ରିୟ ସଙ୍ଗୀତ ନିର୍ଦ୍ଦେଶକ ଗୁଡଲି ରଥ ଏବଂ କ୍ୟାମେରା ପରିଚାଳନା କରିଛନ୍ତି ବଲିଉଡର ସୁପରିଚିତ କ୍ୟାମେରାମ୍ୟାନ ଚନ୍ଦ୍ରଶେଖର ରଥ ଓ ଓଲିଉଡ଼ର ଜଣାଶୁଣା କ୍ୟାମେରାମ୍ୟାନ ସୀତାଂଶୁ ମହାପାତ୍ର।
ଅଭିନେତା ସିଦ୍ଧାନ୍ତଙ୍କ କହିବା ଅନୁଯାୟୀ ଏହା ଏକ ଫାଇନାଇଟ ସିରିଜ। ଏଥିରେ ସବୁକିଛି ପୂର୍ବ ନିର୍ଦ୍ଧିଷ୍ଟ, କିଛି ବି ପରିବର୍ତ୍ତନ କରାଯାଇ ପାରିବ ନାହିଁ, ଯାହାକି ତଥାକଥିତ ଧାରାବାହିକରେ ଦେଖିବାକୁ ମିଳେ ନାହିଁ ।’ ପ୍ରସାରଣ ସମ୍ପର୍କରେ ପ୍ରଯୋଜକ ଅକ୍ଷୟ ପରିଜା କୁହନ୍ତି, ‘ ‘କେମିତି କହିବି କହ’ ଏକ ଧାରାବାହିକ ନୁହେଁ, ଏକ ବିରାଟ ପରିକଳ୍ପନା।  ଏହା ସମ୍ଭବ ହୋଇପାରିଛି କେଵଳ ଜୀ-ସାର୍ଥକ ପାଇଁ, ଆମର ସମସ୍ତ କଳାକାର ଓ ଟେକନିସିଆନଙ୍କ ପାଇଁ। ପ୍ରସାରଣକୁ ନେଇ ଆମେ ସଭିଏଁ ଉତ୍ସାହିତ ଅଛୁ। ନିର୍ମାଣଶୈଳୀ ଓ କୌଶଳଗତ ଦୃଷ୍ଟିରୁ ଏହାକୁ ଆଶାତୀତ ଦର୍ଶକୀୟ ସମର୍ଥନ ମିଳିବ ବୋଲି ନିଃସନ୍ଦେହରେ ଏବେଠୁ କୁହାଯାଇପାରେ।’

LEAVE A REPLY

Please enter your comment!
Please enter your name here